اسلام آباد(این این آئی) وزیراعظم شہباز شریف نے پوری قوم کو 77ویں یوم آزادی پر مبارکباد دی ہے۔انہو ں نے کہا کہ یہ دن حق خودارادیت کے لیے برصغیر کے مسلمانوں کی تاریخی جدوجہد کی یاد دلاتا ہے۔وزیراعظم نے کہا کہ آج کے دن ہمیں اپنے اختلافات بھلا کر اتحاد سالمیت اور معاشی استحکام کے لئے پرعزم ہوکر کام کرنے کی ضرورت ہے۔ شہبازشریف نے اپنے پیغام میں اندرون و بیرون ملک مقیم پاکستانی عوام کو دلی مبارک باد دی ہے۔انہوں نے کہا کہ ہم اپنے آباد و اجداد اور تحریک پاکستان کے بے شمار گمنام ہیروز کو عظیم قربانیوں پر خراج عقیدت پیش کرتے ہیں جنہوں نے جنوبی ایشیا میں لاکھوں مسلمانوں کے لیے ایک آزاد ملک کے حصول کے لئے انتھک جدوجہد کی جہاں وہ اپنے عقائد اور اقدار کے مطابق زندگی بسر کرسکیں۔شہبازشریف کا کہنا تھا کہ پاکستان خودارادیت کے بنیادی حق کے حصول تک بھارت کے غیر قانونی زیر قبضہ جموں و کشمیر اور فلسطین کے لوگوں کی اخلاقی سیاسی اور سفارتی حمایت جاری رکھے گا۔انہوں نے کہا کہ ہم اپنے جائز حق کے لیے جدوجہد کرنے والے مظلوم فلسطینیوں کی حمایت جاری رکھیں گے۔
