دبئی (این این آئی)انٹرنیشنل کرکٹ کونسل (آئی سی سی) نے اگلے 4 ویمن ایونٹس کے میزبان ملکوں کا اعلان کردیا، پاکستان کو کسی ایونٹ کی میزبانی نہ مل سکی۔آئی سی سی ویمن ٹی ٹوئنٹی ورلڈ کپ 2024 بنگلا دیش میں ہوگا، 2025 میں آئی سی سی ویمن ورلڈ کپ بھارت میں کھیلا جائے گا، انگلینڈ کو 2026 کے ویمن ٹی ٹوئنٹی ورلڈ کپ کا میزبان مقرر کردیا گیا ہے۔اس کے علاوہ سری لنکا کو 2026 میں ہونیوالی اولین ویمن چیمپئنز ٹرافی کا مشروط میزبان مقرر کیا گیا ہے، ویمنز چیمپئنز ٹرافی میں چھ ٹیمیں شرکت کریں گی، سری لنکا کی میزبانی کوالیفکیشن سے مشروط ہوگی۔میزبان ملکوں کا فیصلہ برمنگھم میں آئی سی سی کے اجلاس کے دوران کیا گیا۔اجلاس میں فیصلہ کیا گیا کہ آئی سی سی ٹیسٹ چیمپئن شپ فائنل 2023 لارڈز میں کھیلا جائے گا، لارڈز کو 2025 کے ٹیسٹ چیمپئن شپ فائنل کا میزبان بھی مقررکردیا گیا ہے۔سالانہ اجلاس میں فیوچر ٹور پروگرام (ایف ٹی پی) کو فائنل کرلیا گیا، کیلنڈر جلد جاری کردیا جائے گا۔آئی سی سی کی جانب سے آئیوری کوسٹ، کمبوڈیا اور ازبکستان کو ایسوسی ایٹ رکنیت دے دی گئی۔
