دوحہ(این این آئی)وفاقی وزیر اطلاعات، نشریات، قومی ورثہ و ثقافت عطااللہ تارڑ نے کہا ہے کہ پاکستان اور قطر کے درمیان تاریخی، ثقافتی اور مذہبی روابط موجود ہیں، ثقافتی رشتوں کو مضبوط بنانا وزیراعظم پاکستان شہباز شریف کا وژن ہے۔ یہ بات انہوں نے قطر کے وزیر ثقافت عبدالرحمان بن حماد الثانی کی خصوصی دعوت پر فارج ال فن فیسٹیول میں شرکت کے موقع پر گفتگو کرتے ہوئے کہی۔ وفاقی وزیر اطلاعات نے قطر کی وزارت ثقافت اور وزیر ثقافت عبدالرحمان بن حماد الثانی کو فیسٹیول کے لئے بہترین انتظامات پر مبارکباد دی۔ فیسٹیول کے موقع پر وفاقی وزیر اطلاعات عطااللہ تارڑ کی تاجکستان کی وزیر ثقافت Matlubakhon Sattoriyen اور عراق کے وزیر برائے ثقافت ڈاکٹر احمد ال فکک ال بدرانی کے ساتھ ملاقات بھی ہوئی۔ اس موقع پر گفتگو کرتے ہوئے عطااللہ تارڑ نے کہا کہ قطر کے ثقافتی ورثے کو محفوظ رکھنے اور اسے فروغ دینے کی لگن ایک اعزاز ہے۔ فارج الفن جیسے ایونٹس ثقافتی تبادلوں کی اہمیت کا اظہار ہیں۔ انہوں نے کہا کہ پاکستان اور قطر کے درمیان تاریخی، ثقافتی اور مذہبی روابط موجود ہیں، دونوں ممالک کے درمیان ثقافتی تعاون میں نمایاں اضافہ ہوا ہے۔ انہوں نے کہا کہ ثقافتی رشتوں کو مزید مضبوط بنانا وزیراعظم پاکستان شہباز شریف کا وژن ہے۔ عطااللہ تارڑ نے کہا کہ ایسے ایونٹس اقوام کو ایک دوسرے کے قریب لانے، باہمی احترام کو بڑھانے اور مشترکہ ورثے کا تبادلہ کرنے میں مدد فراہم کرتے ہیں۔ انہوں نے عالمی سطح پر فن کے منظر نامے کیلئے روایتی اور جدید قطری فنون پیش کرنے میں فارج الفن فیسٹیول کے گراں قدر کردار کو سراہتے ہوئے کہا کہ پاکستان کی وزارت ثقافت و قومی ورثہ ثقافتی تعاون کے فروغ جیسے اقدامات کی حمایت کرے گی۔ انہوں نے کہا کہ پاکستان اور قطر کے درمیان دوستی اور ثقافتی تبادلے مزید گہرے ہوں گے۔ واضح رہے کہ حال ہی میں پاکستان اور قطر نے ثقافت کے شعبے میں تعاون کو فروغ دینے کے معاہدے پر دستخط کئے ہیں اس معاہدے کے تحت 132فن پاروں کو قطر بھیجا گیا ہے تاکہ انہیں منظر – آرٹ اینڈ آرکیٹیکچر آف پاکستان 1940سے اب تک کے تحت قطر میوزیم میں نمائش کیلئے پیش کیا جا سکے۔ فارج الفن فیسٹیول 31اکتوبر سے 6نومبر تک جاری رہے گا۔ فیسٹیول میں قطر کے متنوع جدید فنون کو پیش کیا جا رہا ہے۔ فارج الفن فیسٹیول فنکاروں، تخلیق کاروں اور ثقافت سے محبت رکھنے والوں کے لئے ایک اہم پلیٹ فارم ہے، اس فیسٹیول میں پورے خطے بشمول دنیا بھر سے فنکاروں کو ورکشاپس اور سیمینارز میں شرکت کیلئے مدعو کیا گیا۔
