لاہور(این این آئی)پاکستان اولمپک ایسوسی ایشن (پی او اے) کے نو منتخب صدر عارف سعید نے کہا ہے کہ میرٹ اور ایمانداری کریں گے تو کھیلوں میں کامیابی خود ملے گی۔میڈیا سے گفتگو کرتے ہوئے عارف سعید کا کہنا تھا کہ پہلا ہدف انتظامی امور سے بڑھ کر کھیل کے اقدار کو اہمیت دینا ہے۔ کھیلوں میں اخلاقیات اور اسپورٹ سمین شپ کو لیکر آئیں گے۔انہوں نے کہا کہ یہ سوچ اب فرسودہ ہوچکی ہے کہ ہم پہلے میڈل لیں گے اور پھر ایماندار ہو جائیں گے۔ اولمپک ازم کے مطابق ہاؤس کو چلانے کی کوشش کریں گے۔عارف سعید کا کہنا تھا کہ ہم سب کے ساتھ مل کر کھیلوں کی ترقی کیلیے کام کریں گے اور یہی ہمارا مقصد ہے۔ ہم مل کر کر طے کریں گے کہ ہم نے کھیل اور کھلاڑیوں کی کامیابی کیلیے کیا کرنا ہے۔نو منتخب صدر پی او اے نے کہا کہ ساؤتھ ایشین گیمز کیلیے ابھی بہت کام پڑا ہے، گیمز کیلیے بہت سرمائے کی ضرورت ہے۔ حکومت کے ساتھ مل کر ساؤتھ ایشین گیمز کو پاکستان کا شو کیس بنائیں گے۔ پاکستان ساف گیمز کرئے گا تو بڑی گیمز کیلیے آگے بڑھے گا۔انکا کہنا تھا کہ سندھ حکومت نے نیشنل گیمز کی منظوری دیدی ہے۔ نیشنل گیمز کی تاریخیں اپریل مئی کے دوران طے ہو جائیں۔
