لاہور( این این آئی)لاہور سمیت پنجاب کے کئی شہربدستور شدید دھند کی لپیٹ میں رہے جس کی وجہ سے معمولات زندگی متاثر رہے ،دھند کے باعث لاہور ایئر پورٹ پر فلائٹ آپریشن متاثر ہونے سے 6پروازیں تاخیر کا شکار ہوئیں، سیالکوٹ ایئرپورٹ پر بھی دھند کی وجہ سے پروازیں منسوخ کر دی گئیں۔ ترجمان موٹرویز پولیس کے مطابق حد نگاہ کم ہونے پر موٹر ویز متعدد مقامات سے بند رکھی گئی، موٹر وے ایم2 لاہور سے کوٹ مومن، ایم3 فیض پور سے درخانہ ، لاہور سیالکوٹ موٹروے ایم 11 پر دھند کے باعث بند رکھی گئی ۔قومی شاہراہوں پر حد نگاہ کم ہونے سے ٹریفک کی روانی شدیدمتاثر ہوئی۔گوجرانوالا ایکسپریس وے کو بھی ٹریفک کے لیے بند رکھا گیا، جہلم، حافظ آباد اور گردونواح میں شدید دھند کے سبب ٹریفک کی روانی متاثر رہی۔شہروں کے اندر بھی سڑکوں پر دھند چھائی رہی ۔شدید دھند کی وجہ سے ائیر پورٹ پر حد نگاہ انتہائی کم ہونے کی وجہ سے چھ پروازیں تاخیر کا شکار رہیں جبکہ سیالکوٹ ائیر پورٹ پر بھی دھند کی وجہ سے پروازیں منسوخ کر دی گئیں۔
