لاہور( این این آئی)پاکستان تحریک انصاف کے سیکرٹری جنرل سلمان اکرم راجہ نے کہا ہے کہ 9 مئی 2023 اور 26 نومبر 2024 کے احتجاج کے حوالے حکومت نے جوڈیشل کمیشن کی تشکیل کے سلسلے میں ٹھوس یقین دہانی نہیں کرائی تو پھر اس کے ساتھ جاری مذاکراتی عمل کو ختم سمجھا جائے،مذاکرات ہماری کمزوری نہیں ہیں، ہماری پارٹی اور سابق وزیراعظم عمران خان ملک میں تنا ئوکا خاتمہ چاہتے ہیں۔ایک انٹر ویو میں انہوں نے کہا کہ وزیر دفاع خواجہ آصف اور وزیر اطلاعات و نشریات عطا تارڑ نے ماحول خراب کرنے کی کوشش کی، ہم ملکی فلاح کے لیے مذاکرات جاری رکھنا چاہتے ہیں۔انہوں نے کہاکہ بانی پی ٹی آئی عمران خان سے ملاقات کرانا حکومت کا اختیار ہے، سابق وزیر اعظم اپنے موقف پر ڈٹے ہوئے ہیں اور اہم مذاکرت کی تیسری نشست کے لیے تیار ہیں۔انہوں نے کہا کہ 9 مئی 2023 اور 26 نومبر 2024 کے احتجاج کے حوالے جوڈیشل کمیشن کی تشکیل کے سلسلے میں حکومت نے مذاکرات کی تیسری نشست میں ٹھوس یقین دہانی نہیں کرائی تو پھر مذاکراتی عمل کو ختم سمجھا جائے۔گیند اب حکومتی کورٹ میں ہے اور تیسری نشست میں کمیشن کی تشکیل پر ٹھوس یقین دہانی ہوجانی چاہیے۔
