نیویارک(این این آئی) حماس نے اعلان کیا ہے کہ غزہ اور شمالی گورنری کے رہائشیوں کو ایک لاکھ 35 ہزار خیموں کی ضرورت ہے۔غیرملکی خبررساں ادارے کے مطابق حماس کے میڈیا آفس نے ایک بیان میں کہا ہے کہ غزہ اور شمالی گورنری کو ایک لاکھ 35 ہزار خیموں اور کارواں کی فوری ضرورت ہے۔ حماس نے ایک بیان میں اس بات کا بھی ذکر کیا کہ اسرائیلی فوج کی طرف سے دونوں گورنریوں میں ہونے والی تباہی کا تناسب 90 فیصد سے زیادہ ہے۔ انہوں نے عالمی برادری، بین الاقوامی تنظیموں اور عرب ممالک سے مطالبہ کیا کہ وہ کراسنگ کو کھولنے کے لیے کام کریں اور لوگوں کو پناہ دینے کے لیے بنیادی سامان کی فراہمی پر توجہ دیں۔حماس نے یہ بھی نشاندہی کی کہ اس وقت 5500 سے زائد سرکاری ملازمین جنوبی اور وسطی گورنریٹس سے تمام سرکاری اداروں، وزارتوں سے غزہ اور شمالی گورنریٹس میں بے گھر ہونے والے افراد کی واپسی میں سہولت فراہم کرنے کے لیے کام کر رہے ہیں۔ یہ سب اس وقت ہوا جب سیکڑوں ہزاروں بے گھر افراد نے پیر کی صبح جنگ بندی معاہدے پر عمل درآمد کرتے ہوئے شمالی غزہ کی وادی میں واپسی شروع کی مشکل صورتحال کے باوجود لوگوں نے زبردست خوشی کا مظاہرہ بھی کیا۔
