اسلام آباد(این این آئی)اسلام آباد ہائیکورٹ کے ججز کے خط پر مشیر وزارت قانون بیرسٹرعقیل ملک نے کہا ہے کہ ہائیکورٹ کے جج کے تبادلے کیلئے مشاورت اور متعلقہ جج کی رضامندی ضروری ہے۔نجی ٹی وی کے پروگرا م میں گفتگوکرتے ہوئے بیرسٹرعقیل ملک نے کہا کہ اسلام آباد ہائیکورٹ کو مینج کرنے کا تاثر غلط ہے، ایسا ممکن نہیں ہے کہ ہائیکورٹ کے جج کا تبادلہ کرکے اسے سینیارٹی میں دوسری ہائیکورٹ کے جج کے نیچے لگا دیا جائے۔ انہوں نے کہاکہ ابھی نہ مشاورت ہوئی ہے اور نہ ہی کوئی پراسیس شروع ہوا ہے، جب آئین کسی چیز کی اجازت دیتا ہے تو اسے کوئی نہیں روک سکتا۔بیرسٹرعقیل ملک نے کہاکہ ہائیکورٹ کے جج کے تبادلے کیلئے مشاورت اور متعلقہ جج کی رضامندی ضروری ہے، جج کسی بھی ہائیکورٹ سے آ سکتا ہے، یہ نئی تعیناتی نہیں ہے جس کیلئے نیا حلف لینے کی ضرورت ہو۔
