اسلام آباد(این این آئی)پاکستان اور ترکیہ کے درمیان صدر طیب اردوان کے آئندہ دورہ پاکستان کے دوران زرعی شعبے سمیت اقتصادی تعاون کو بڑھانے کیلئے مفاہمت کی متعدد یادداشتوں پر دستخط کیے جانے کا امکان ہے۔ایک رپورٹ کے مطابق پاکستان اور ترکیہ کی قومی غذائی تحفظ اور زراعت کی وزارتوں کے سینئر حکام نے زراعت اور لائیو اسٹاک کے شعبوں میں مستقبل کے تعاون کیلئے ایک ایکشن پلان وضع کرنے کیلئے میٹنگ کی۔پاکستان نے ترکیہ کو ملک میں22 کروڑ جانوروں کو اجاگر کرتے ہوئے مویشیوں کی ویکسینیشن میں سرمایہ کاری کرنے کی دعوت دی ہے جبکہ ترکیہ نے پاکستان کی زرعی پیداوار بڑھانے کیلئے اپنے مکمل تعاون کی یقین دہانی کرائی ہے۔رپورٹ کے مطابق ترک صدر طیب اردوان کا 12 فروری کو پاکستان کا دورہ متوقع ہے جہاں وہ13 فروری کو وزیر اعظم شہباز شریف کے ساتھ پاکستانـترکیہ ہائی لیول اسٹریٹجک کوآپریشن کونسل (ایچ ایل ایس سی سی) کے ساتویں اجلاس میں شریک صدارت ہوں گے۔
