موغادیشو (این این آئی)داعش نے صومالیہ کے شمال مشرقی حصے میں پنٹ لینڈ ریاست میں فوجی اڈے پر رات کے وقت خودکش کار بم دھماکہ کے علاوہ موٹر سائیکلوں کی مدد سے بھی خودکش حملے کیے ہیں، تاہم فوجی حکام نے کہاہے کہ داعش کا حملہ ناکام بناتے ہوئے بمباری سے جنگجوئوں کے 70 افراد کو ہلاک کر دیا ہے۔غیرملکی خبررساں ادارے کے مطابق صومالی فوج کی طرف سے یہ بیان گزشتہ روز جاری کیا گیا ۔ صومالیہ کی فوج نے ایک اور بڑی کارروائی کا بتایا جس میں درجنوں جنگجوں کی ہلاکت کی اطلاع دی گئی ہے۔اس بیان میں صومالی فوج کے ترجمان محمود فیضیقو کی طرف سے کہا گیا ہے کہ صومالی فوج نے خودکش حملہ آوروں کو نشانہ بناتے ہوئے انہیں بھاری نقصان پہنچایا ہے۔ بیان میں فوج کے جانی نقصان کا بھی ذکر کیا گیا ہے مگر فوجی ہلاکتوں کی تعداد نہیں بتائی گئی ہے۔
