واشنگٹن /عمان(این این آئی )امریکی صدر ڈونلڈ ٹرمپ نے اردن کے فرمانروا شاہ عبداللہ دوم سے ملاقات کے دوران غزہ کی پٹی پر امریکی کنٹرول اور اس کے باشندوں کی مستقل منتقلی کے لیے اپنے منصوبے کا اعادہ کیا ہے جب کہ اردن سمیت واشنگٹن کے عرب اتحادیوں میں ان کے منصوبے کی وسیع تر مخالفت بھی جاری ہے۔غیرملکی خبررساں ادارے کے مطابق اردنی فرمانروا اور ان کے ولی عہد وائٹ ہائوس پہنچنے کے تھوڑی دیر بعد صحافیوں کو اوول آفس میں جانے کی اجازت دی گئی جہاں امریکی صدر نے ایک با پھر کہاکہ وہ غزہ کی پٹی کا کنٹرول سنبھالنے، علاقے کیمکینوں کو منتقل کرنے اور جنگ زدہ علاقے کو نئی شکل دینے کے اپنے منصوبے سے پیچھے نہیں ہٹیں گے۔ٹرمپ نے غزہ کی پٹی کے بارے میں کہاکہ “ہم اسے لینے جا رہے ہیں، ہم اسے اپنے پاس رکھیں گے۔ ہم اس کی قدر کریں گے۔ ہم اسے بالآخر ایک ایسی جگہ بنانے جا رہے ہیں جو مشرق وسطی میں لوگوں کے لیے بہت زیادہ ملازمتیں پیدا کرے گا،” ٹرمپ نے غزہ کی پٹی کے بارے میں کہاکہ ان کا منصوبہ خطے میں “امن” لائے گا۔ٹرمپ نے کہا کہ اگر اردن نے فلسطینیوں کو آباد کرنے سے انکار کیا تو وہ اس کی امداد روکنے پر غور کریں گے۔
