اسلام آباد(این این آئی)ملک میں یکم رمضان کو بینک اکاؤنٹ میں ایک لاکھ 79 ہزار 689 روپے یا اس سے زائد رقم موجود ہوئی تو زکوٰة کی کٹوتی ہوگی۔رپورٹ کے مطابق وفاقی وزارت تخفیف غربت و سماجی تحفظ نے سال 2025 کیلئے زکوٰةکا نصاب جاری کر دیا ہے۔وزارت تخفیف غربت و سماجی تحفظ کی جانب سے بینکوں کو مراسلہ بھیجا گیا ہے جس کے مطابق بچت اکاؤنٹ، نفع و نقصان اور اس طرح کے اکاؤنٹس پر زکوٰة لاگو ہوگی، کرنٹ اکاؤنٹس سے زکوٰة نہیں کاٹی جائے گی۔بینکوں کو بھیجے گئے مراسلے میں کہا گیا کہ زکوٰة کی مد میں کٹوتی یکم یا 2 مارچ کو رمضان کی پہلی تاریخ کی مناسبت سے ہوگی۔مراسلے میں کہا گیا کہ زکوٰة و عشر آرڈیننس 1980 کے مطابق یکم رمضان المبارک کو ایک لاکھ 79 ہزار689 روپے سے کم بیلنس کے اکاؤنٹس زکوٰة کٹوتی سے مستثنیٰ ہوں گے اور ان سے زکوٰة منہا نہیں کی جائے گی۔
