اسلام آباد(این این آئی)دفتر خارجہ کے ترجمان نے کہا ہے کہ وزیر اعظم شہباز شریف نے 2 روزہ سرکاری دورہ ازبکستان ازبک صدر شوکت مرزیوئیف کی دعوت پر کیا تھا، ان اعلیٰ سطح کے روابط سے اقتصادی شراکت داری، عالمی و علاقائی تعاون اور تعلقات میں وسعت آئے گی۔دفتر خارجہ ترجمان کے مطابق وزیر اعظم شہباز شریف کے دورہ ازبکستان کے اختتام پر مشترکہ اعلامیہ جاری کیا گیا ہے۔ترجمان نے بتایا کہ پاکستان اور ازبکستان کے درمیان تاریخی، برادرانہ تعلقات کے اعادے پر اتفاق ہوا ہے، دو طرفہ تعاون کے فروغ کیلئے قیادت نے عزم کا اظہار کیا ہے۔دفتر خارجہ کے ترجمان کے مطابق اس دورے کے دوران تجارت، روابط، ثقافت اور عوامی تبادلے پر تبادلہ خیال کیا گیا، علاقائی رابطے کے فروغ کیلئے ٹرانسـافغان ریلوے اور تجارتی راہداریوں پر بات چیت ہوئی۔ترجمان دفتر خارجہ نے بتایا کہ 25 فروری کو تاشقند میں پاکستان ازبکستان بزنس فورم سے وزیر اعظم نے خطاب کیا۔ترجمان دفتر خارجہ نے بتایا کہ وفد میں شامل شخصیا ت اور ازبکستان کی کاروباری شخصیات کے درمیان سرمایہ کاری اور مشترکہ منصوبوں پر بھی غور کیا گیا۔ترجمان نے بتایا کہ اس دورے کے دوران مشترکہ مفادات میں تعاون بڑھانے کیلئے متعدد معاہدوں اور مفاہمتی یادداشتوں پر دستخط بھی ہوئے ہیں۔
