لاہور (این این آئی)وائس چیئرپرسن اوورسیز پاکستانیز کمیشن پنجاب و چیف کوآرڈنیٹر انٹرنیشنل افیئرز بیرسٹر امجد ملک نے سمندر پار پاکستانیوں کو اثاثہ قرار دیتے ہوئے کہاہے کہ اوورسیز پاکستانیز کمیشن پنجاب کے دروازے سب کےلئے ہمیشہ کھلے ہیں،مسائل کے حل کےلئے حکومت انقلابی اقدامات کر رہی ہے،کوشش ہے اوورسیز پاکستانیز کمیشن پنجاب کو ون ونڈو آپریشن میں تبدیل کریں۔ جاری بیان کے مطابق وائس چیئرپرسن اوورسیز پاکستانیز کمیشن پنجاب و چیف کوآرڈنیٹر انٹرنیشنل افیئرز بیرسٹر امجد ملک کی زیر صدارت پنجاب اووسیز پاکستانی کمیشن پنجاب کی تیسری ای کچہری منعقد ہوئی جس میں بیرسٹر امجد ملک نے بیرون ممالک مقیم پاکستانیوں کے مسائل سنے۔اس موقع پر کمشنر اوورسیز پاکستانیز کمیشن پنجاب مرزا نصیر عنایت اور او پی سی کے اعلیٰ افسران بھی موقع پر موجود تھے۔ ای کچہری میں امریکہ ، کینیڈا، سعودی عرب، یو اے ای، اٹلی ، ساو¿تھ افریقہ و دیگر ممالک میں مقیم پاکستانیوں نے اپنے مسائل کے بارے میں آگاہ کیا۔بیرسٹر امجد ملک نے شکایات نمبر نوٹ کئے اور مسائل کے حل کےلئے موقع پر افسران کو احکامات جاری کئے۔ اس موقع پر گفتگو کرتے ہوئے بیرسٹر امجد ملک نے کہا کہ سمندر پار پاکستانیز ہمارا اثاثہ ہیں جو ملکی ترقی میں کلیدی کردار ادا کرتے ہیں،ان کے مسائل حل کرنا میری پہلی ترجیح ہے۔ انہوں نے کہا کہ اوورسیز پاکستانیز کمیشن پنجاب کے دروازے سب کےلئے ہمیشہ کھلے ہیں،حکومت بیرون ملک مقیم پاکستانیوں کے مسائل کے حل کےلئے انقلابی اقدامات کر رہی ہے۔ انہوں نے کہاکہ ہماری کوشش ہے اوورسیز پاکستانیز کمیشن پنجاب کو ون ونڈو آپریشن میں تبدیل کریں، حکومت چاہتی ہے اوورسیز کی شکایات کے حل کے علاوہ باقی تمام خدمات بھی مہیا کی جائیں۔ انہوں نے کہا کہ بہت جلد ضلعی سطح پر تمام کمیٹیاں فعال ہو جائیں گی۔اس موقع پر بیرسٹر امجد ملک نے تارکین وطن کی شکایات پر تیزی کیساتھ داد رسی کیلئے اندرون و بیرون ملک کھلی کچہری کو ماہانہ وار منعقد کرنے کا فیصلہ کیا ۔
