لاہور(این این آئی) خواتین کی قومی سلیکشن کمیٹی نے 9 سے 19 اپریل تک لاہور کے قذافی سٹیڈیم اور ایل سی سی اے گراؤنڈ میں ہونے والے آئی سی سی ویمنز کرکٹ ورلڈکپ کوالیفائر کیلئے 15 رکنی قومی سکواڈ کا اعلان کر دیا۔سکواڈ کا انتخاب سلیکشن کمیٹی کی جانب سے جاری دوسرے مرحلے کے تیاری کے کیمپ میں کھلاڑیوں کی فٹنس اور فارم کا جائزہ لینے کے بعد کیا گیا ہے جہاں کھلاڑیوں نے وارم اپ میچز اور پریکٹس سیشنز میں حصہ لیا۔فاطمہ ثنا جنہوں نے 6 ٹی 20 اور دو ون ڈے میچوں میں پاکستان کی قیادت کی ہے 50 اوورز کے اس ایونٹ میں بھی ٹیم کی قیادت جاری رکھیں گی جبکہ شوال ذوالفقار دسمبر 2023 میں نیوزی لینڈ کے دورے کے دوران کندھے کی انجری میں مبتلا ہونے کے بعد اب قومی ٹیم میں واپس آئی ہیں۔فاطمہ ثنا (کپتان) منیبہ علی (نائب کپتان)، عالیہ ریاض، ڈیانا بیگ، گل فیروزہ، نجیہہ علوی (وکٹ کیپر) نشرہ سندھو، نتالیہ پرویز، عمیمہ سہیل، رامین شمیم، سعدیہ اقبال، شوال ذوالفقار، سدرہ امین، سدرہ نواز (وکٹ کیپر) اور سیدہ عروب شاہ قومی سکواڈ کا حصہ ہیں۔غلام فاطمہ، وحیدہ اختر اور ام ہانی ریزرو کھلاڑیوں میں شامل ہیں۔پلیئر سپورٹ سٹاف میں حنا منور (منیجر)، محمد وسیم (ہیڈ کوچ)، جنید خان (اسسٹنٹ کوچ باؤلنگ)، عبدالرحمٰن (اسسٹنٹ کوچ سپن باؤلنگ)، عبدالسعد (اسسٹنٹ کوچ فیلڈنگ)، ولید احمد (انالسٹ)، محمد رفیع اللہ (میڈیا منیجر)، محمد رمضان (اسٹرینتھ اینڈ کنڈیشننگ کوچ)، تحریم سنبل شاہ (فزیوتھراپسٹ)، کرن شہزادی(میسیور)شامل ہیں۔6 ٹیموں پر مشتمل آئی سی سی ایونٹ جس میں میزبان پاکستان کے ساتھ بنگلا دیش، آئرلینڈ، سکاٹ لینڈ، تھائی لینڈ اور ویسٹ انڈیز شامل ہیں سنگل لیگ راؤنڈ رابن فارمیٹ پر مشتمل ہو گا۔لاہور کا قذافی سٹیڈیم اور ایل سی سی اے گراؤنڈ اس ایونٹ کے 15 میچوں کی میزبانی کریں گے، قذافی سٹیڈیم میں ہونے والے افتتاحی میچ میں پاکستان اور آئرلینڈ کی ٹیمیں مدمقابل آئیں گی۔
