اسام آباد(این این آئی)وفاقی حکومت نے ڈی پورٹ افراد کے خلاف مقدمہ درج کرنے اور پاسپورٹ منسوخ کرنے کا فیصلہ کرلیا جبکہ ڈی پورٹ افراد 5 سال کے لیے بیرون ملک بھی نہیں جاسکیں گے۔میڈیارپورٹ کے مطابق اسلام آباد میں وفاقی وزیر داخلہ محسن نقوی کی زیر صدارت اہم اجلاس ہوا۔اجلاس میں فیصلہ کیا گیا کہ ڈی پورٹ افراد کے خلاف ایف آئی آر کا اندراج کیا جائے گا۔ ڈی پورٹ ہونے والوں کے پاسپورٹ منسوخ کیے جائیں گے، جبکہ ڈی پورٹ افراد کو 5 سال کے لیے پاسپورٹ کنٹرول لسٹ پر ڈالا جائے گا۔اجلاس میں پاسپورٹ قوانین مزید بہتر بنانے کے لیے سیکریٹری داخلہ کی سربراہی میں کمیٹی بھی قائم کی گئی۔وفاقی وزیر داخلہ نے واضح کیا کہ ڈی پورٹ افراد پاکستان کے لیے عالمی سطح پر شرمندگی کا باعث بن رہے ہیں، ڈی پورٹ افراد سے کوئی رعایت نہیں برتی جائے گی۔یاد رہے کہ رواں سال اپریل میں وفاقی وزیر داخلہ محسن نقوی نے اعلان کیا تھا کہ حکومت مجرمانہ سرگرمیوں کی وجہ سے دوسرے ممالک سے ڈی پورٹ کیے گئے پاکستانیوں کے پاسپورٹ بلاک کرے گی اور نئی سفری دستاویزات کے اجرا کا عمل سخت کرے گی۔اس اقدام کا مقصد بیرون ملک جاکر بھیک مانگنے جیسے غیر قانونی کام کرنے والے پاکستانی شہریوں کو روکنا ہے۔حالیہ برسوں میں سیکڑوں پاکستانیوں کو بھیک مانگنے کے الزام میں ملک بدر کیا جا چکا ہے جن میں سے زیادہ تر کو خلیجی ممالک سے بھیجا گیا ہے۔
