فیصل آباد (این این آئی)زرعی یونیورسٹی فیصل آباد میں قائم نیشنل انکیوبیشن سینٹر (این آئی سی) نے اسٹارٹ اپ گریجویشن تقریب کا انعقاد کیا، جس میں چوتھے کوہورٹ کے 11 اسٹارٹ اپس نے سرٹیفکیٹ حاصل کئے۔ وزیراعظم کے معاون خصوصی برائے کامرس رانا احسان افضل خاں نے بطور مہمانِ خصوصی خطاب کرتے ہوئے کہا کہ حکومت نوجوان نسل میں جدت اور کاروباری مہارتوں کو فروغ دینے کے لئے تمام ممکنہ اقدامات عمل میں لا رہی ہے تاکہ ترقی کی منازل کو احسن انداز سے طے کیا جا سکے۔ انہوں نے کہا کہ حکومت نجی شعبے کی بھرپور معاونت کر رہی ہے تاکہ کاروباری ماحول کو فروغ دیا جائے اور معاشی ترقی کو تقویت ملے۔ ان کا کہنا تھا کہ ان اقدامات کا مقصد ملک بھر میں زیادہ سے زیادہ روزگار کے مواقع پیدا کرنا ہے۔ زرعی یونیورسٹی فیصل آباد کے وائس چانسلر ڈاکٹر ذوالفقار علی نے اپنے پیغام میں کہا کہ نوجوان نسل کی تخلیقی و کاروباری صلاحیتوں کو نکھارنے کی ضرورت ہے، جو ملک کو علم پر مبنی معیشت کی طرف لے جائے گا۔ انہوں نے ملک کی ترقی میں کردار ادا کرنے کے لیے روایتی سوچ سے ہٹ کر سائنسی بنیادوں پر مسائل کے حل تلاش کرنا ہوں گے۔ اِگنائٹ نیشنل ٹیکنالوجی فنڈ کے اسسٹنٹ منیجر معاذ ناصر نے کہا کہ یہ ایک نئے سفر کا آغاز ہے جہاں نوجوان اپنے خیالات، عزم اور جذبے سے مستقبل کی تشکیل کریں گے۔ این آئی سی ایف کے پراجیکٹ ڈائریکٹر ذیشان شاہد نے بتایا کہ ستمبر 2022ء میں اپنے آغاز سے لے کر اب تک این آئی سی ایف نے تقریباً 80 اسٹارٹ اپس کی رہنمائی کی ہے، جنہوں نے 1,100 سے زائد روزگار کے مواقع پیدا کیے اور پاکستان کی معیشت میں نمایاں کردار ادا کیا۔ بزنس انکیوبیشن سینٹر کے ڈائریکٹر ڈاکٹر افتخار احمد نے کہا کہ طلبہ کی تخلیقی اور کاروباری صلاحیتوں کو نکھارنے کے لیے ہر ممکن کوششیں کی جا رہی ہیں۔ ڈاکٹر ظہیر احمد، وقار بن شاہد اور نعمان سندھو کے اسٹارٹ اپس کو خصوصی ایوارڈز سے نوازا گیا۔ اس موقع پر فیصل آباد آئی ٹی کمپنیز آرگنائزیشن کے اویس زیدی، ٹی ایم یو سی کی ہیڈ نگہت نسرین نے بھی خطاب کیا۔
