اسلام آباد (این این آئی)صدر مملکت ڈاکٹر عارف علوی نے کراچی پورٹ ٹرسٹ کی درخواست مسترد کرتے ہوئے وزیر اعظم امدادی پیکیج کے تحت بیوہ کو نوکری دینے کا حکم دیدیا۔ صدر نے وفاقی محتسب کے بیوہ کو نوکری دینے کے فیصلے کو برقرار رکھا۔ صدر مملکت نے کراچی پورٹ ٹرسٹ کے بیوہ کے زائد العمر ہونے کے عذر کو مسترد کردیا،کراچی پورٹ ٹرسٹ نے بیوہ کو 35 سال سے زائد عمر کی وجہ سے ملازمت دینے سے انکار کردیا تھا۔فیصلے کے مطابق کراچی پورٹ ٹرسٹ نے عمر کی حد میں نرمی کا اختیار رکھنے کے باوجود شکایت کنندہ کو نرمی نہیں دی، اسٹیبلشمنٹ ڈویژن کے مراسلے کے مطابق مرحوم سرکاری ملازمین کی بیواؤں کو 50 سال کی عمر تک کنٹریکٹ ملازمت دی جا سکتی ہے۔فیصلے میں کہاگیاکہ بیوہ کو ملازمت سے انکار ناانصافی ، غیر معقول ، قانون کے برخلاف اور بد انتظامی پر مبنی ہے۔
