اسلام آباد (این این آئی)نائب صدر پیپلز پارٹی سینیٹر شیری رحمان نے کہا ہے کہ خاتون سیشن جج کو دھمکی دینے کے خلاف اسلام آباد ہائی کورٹ کا نوٹس خوش آئند ہے۔اپنے بیان میں شیری رحمان نے کہاکہ ججز اور پولیس افسران کو دھمکیاں دینے کی روش قابل تشویش ہے، ان دھمکیوں کو سنجیدہ نا لیا گیا تو یہ رواج بن جائے گا۔ انہوںنے کہاکہ انصاف اور قانون نافذ کرنے والوں کو ہر کوئی ڈرانے دھمکانے کی کوشش کرے گا۔انہوںنے کہاکہ شہید ذوالفقار علی بھٹو کا عدالتی قتل ہوا، شہید بی بی ساری زندگی عدالتوں کا سامنہ کرتی رہی لیکن کسی نے ججز کو دھمکیاں نہیں دی۔ انہوںنے کہاکہ پی ٹی آئی حکومت میں آصف علی زرداری کا مہینوں ریمانڈ دیا جاتا تھا، ہم نے کبھی کسی جج کو دھمکی نہیں دی، یہ دو دن کے ریمانڈ پر جج کو دھمکی دے رہے۔ انہوںنے کہاکہ عمران خان ساری عمر عدالتوں اور ادراوں کے لاڈلے رہے اس لئے اب خود کو قانون اور عدالتوں سے بالا سمجھتے ہیں۔ انہوںنے کہاکہ اپنے غلطی تسلیم کرنے بجائے تحریک انصاف کے رہنماء اب بھی ملک بند کرنے کی دھمکیاں دے رہے، یہ ملک جام کرنے کے منصوبا بھی بنا رہے اور گرفتاری کے ڈر سے چھپ بھی رہے۔
