تھرپاکر (این این آئی)سندھ میں حالیہ بارشوں اور سیلاب نے مختلف اضلاع میں تباہی مچائی دی گئی تاہم صحرائے تھر میں بارشوں سے زندگی میں بہتری کی امید پیدا ہونے لگی ۔تفصیلات کے مطابق صوبہ سندھ میں حالیہ بارشوں اور سیلاب سے لاکھوں افراد متاثر ہوئے ،صحرائے تھر میں برسنے والی بارشیں زندگی کی نئی امید بن گئی۔ایک طرف بارشوں سے صحرا میں ہونی والی ہر طرف ہریالی، ندی نالوں میں پانی اور خوبصورت پہاڑوں سے بہتے جھرنوں کے دلفریب مناظر نے تھر کے صحرا کی خوبصورتی کو چار چاند لگا دئیے ہیں تو دوسری جانب خشک ڈیم بھی پانی سے بھر گئے ہیں۔تھر میں بارش باعث رحمت بن کر برسی تو صحرا کی بنجر زمین میں بھی فصلیں کاشت ہونے لگیں، اس صورتحال سے تھر کے باشندے بہت خوش ہوئے۔حالیہ مون سون بارشوں کے بعد سیاحوں کی بڑی تعداد نے تھر کا رخ کیا اور صحرا میں سبزے کے قدرتی مناظر سے خوب محظوظ ہوئے لیکن تھری باسیوں کی خوشیوں کا اندازہ لفظوں میں ممکن نہیں ۔اس حوالے سے گفتگو کرتے مقامی افراد کا کہنا تھا کہ بارشوں کا سلسلہ ہر سال جاری رہے تو یہ بارشیں ان کی زندگی میں بہتری لاسکتی ہیں تاہم اس کے لیے حکومت کو سیاحت کو فروغ دینے کے ساتھ کاروبار کے لیے مالی مدد کرنا ہوگی۔
