اسلام آباد (این این آئی)صدر عارف علوی سے ایوانِ صدر میں گلگت بلتستان کے گورنر سید مہدی شاہ نے ملاقات کی جس میں ملک کی مجموعی صورتحال ، گلگت بلتستان میں سیلاب کی صورتحال پر گفتگو گئی ۔منگل کو ہونے والی ملاقات میں بلتستان یونیورسٹی میں وائس چانسلر کی مستقل تعیناتی پر بھی بات چیت کی گئی ۔ صدر مملکت نے کہاکہ یونیورسٹی گلگت بلتستان کے لوگوں کو اعلیٰ تعلیم کی فراہمی میں اہم کردار ادا کر رہی ہے۔ انہوںنے کہاکہ یونیورسٹی کو درپیش مْشکلات کو ترجیحی بنیادوں پر حل کرنے کی ضرورت ہے، سیلاب نے ملک کے تمام حصوں کو متاثر کیا۔ صدر مملکت نے کہاکہ موسمیاتی تبدیلی اور گلوبل وارمنگ کی وجہ سے گلیشیئرز کے پگھلنے کی رفتار تیز ہوئی ، گلگت بلتستان کا خطہ موسمیاتی تبدیلیوں کی وجہ سے خصوصی طور پر متاثر ہوا۔ انہوںنے کہاکہ گلگت بلتستان میں سیاحت اور معدنیات کے شعبوں میں ترقی کے وسیع مواقع موجود ہیں۔
