کراچی(این این آئی)پاکستان پیپلزپارٹی کے رہنمااور سابق مشیر پیٹرولیم ڈاکٹر عاصم حسین نے کہاکہ سابق صدر آصف علی زرداری کی انتہائی خراب صحت کی خبریں جھوٹی ہیں۔سابق صدر کے معالج ڈاکٹر عاصم نے اپنے ایک بیان میں بتایا کہ آصف زرداری کی صحت اچھی ہے۔چند دنوں میں آصف زرداری اسپتال سے گھر چلے جائیں گے۔ڈاکٹر عاصم حسین نے سابق صدر اور پیپلز پارٹی کے شریک چیئرمین آصف علی زرداری کے پھیپھڑے کے انفیکشن کے علاج کی تصدیق کی تھی۔انہوں نے بتایاتھا کہ آصف زرداری کے پھیپھڑے کے ایک حصے میں انفیکشن ہے، جس کا علاج کیا جارہا ہے۔انہوں نے کہاکہ سابق صدر کی طبیعت میں پہلے سے بہتری آئی ہے، سینئر ڈاکٹروں کی ٹیم ان کا علاج کر رہی ہے۔دوسری جانب خاندانی ذرائع نے بتایاکہ آصف علی زرداری کی صحت کے حوالے سے سوشل میڈیا پر زیرگردش خبریں غلط ہیں۔ذرائع کے مطابق ڈاکٹرز نے سابق صدر کی طبیعت کو بہتر قرار دیا ہے، آصف علی زرداری ایک دو روز میں اسپتال سے گھر منتقل کردیے جائیں گے۔
