کراچی(این این آئی)سندھ کے وزیر اطلاعات ومانس ٹرانزٹ شرجیل انعام نے کہاہے کہ عمران خان مسیحا نہیں فراڈیا ہے،لیکس سے ثابت ہوگیاہے کہ عمران خان کرسی کی لالچ میں کسی بھی حد تک جا سکتے ہیں ۔عمران خان کی تیسری آڈیو لیک پر رد عمل دیتے ہوئے شرجیل انعام میمن نے کہاکہ عمران خان ہارس ٹریڈنگ کے کاروبار کا سرغنہ ہے،آڈیو میں عمران خان 5 ایم این ایز خود خریدنے کا انکشاف کر رہے ہیں۔انہوں نے کہاکہ عمران خان عوام سے جھوٹ بول کر انہیں گمراہ کرتے رہے ۔وزیراطلاعات سندھ نے کہاکہ2018میں بھی عمران خان کو حکومت بنانے کے لئے اسمبلی میں اکثریت حاصل نہیں تھی،پورے پاکستان میں جہاز دوڑا دوڑا کر ایم این ایز کو خریدا گیا ،جس ایم این اے کو یہ لوگ خرید نہ سکے ان کو ڈرا دھمکا کر اپنے ساتھ ملایا ۔شرجیل انعام میمن نے کہاکہ عوام بالخصوص نوجوانوں کی آنکھیں کھلنی چاہیے ،یہ شخص ہمارے ملک اور معاشرے کے لیے خطرہ ہیں ،لیکس سے ظاہر ہوگیا کہ عمران خان پاکستان کا کرپٹ ترین شخص ، منی لانڈرنگ اور ہارس ٹریڈنگ کا بے تاج بادشاہ ہے۔
