اسلام آباد(این این آئی)وزیر خارجہ بلاول بھٹو زرداری نے اقوامِ متحدہ کی جنرل اسمبلی میں پاکستان میں موسمیاتی تبدیلی کی وجہ سے آنے والی تباہی پر قرارداد منظور ہونے پراظہارِ تشکر کیا ہے۔ایک بیان میں انہوں نے کہا کہ پاکستان کی ایک اور بڑی کامیابی کہ اقوام متحدہ کی جنرل اسمبلی میں پاکستان میں موسمیاتی تبدیلیوں سے ہوئی تباہی پر قرارداد منظور کی گئی۔انہوںنے کہاکہ اقوام متحدہ کی جنرل اسمبلی میں 141 ممالک نے متفقہ طور پر قرارداد منظور کی۔وزیر خارجہ نے کہا کہ چین، امریکا اور روس بھی پاکستان کے لیے ایک پیج پر آگئے۔بیان میں بلاول بھٹو زرداری نے کہا کہ ایک ایسے وقت میں جب جیوپولیٹکل تقسیم انتہائی گہری ہے، چین، امریکا اور روس کی جانب سے قرارداد کو پیش کرنے والوں میں شامل ہونے کے اتحاد کے مظاہرے پر ہم شکر گزار ہیں۔انہوں نے اقوام متحدہ کے سیکریٹری جنرل انتونیو گوتریس، اقوام متحدہ کی جنرل اسمبلی کے صدر اور اقوام متحدہ میں پاکستانی مشن کا بھی شکریہ ادا کیا۔
