اسلام آباد (این این آئی) وزیراعظم شہبازشریف سے فلسطین کے صدر محمود عباس نے ملاقات کی جس میں دونوں قائدین کے درمیان جذباتی گفتگو اسلامی اخوت اوربھائی چارے کی مثال بن گئی ،فلسطین کے صدر اور وزیراعظم شہبازشریف ایک دوسرے سے گرمجوشی سے بغل گیر ہوئے،صدر محمود عباس اور وزیراعظم شہبازشریف میں دلچسپ مکالمہ ہوا ،صدر محمود عباس نے فرط جذبات سے وزیراعظم شہبازشریف کے دونوں ہاتھ اپنے ہاتھوں میں تھام لئے ۔ وزیر اعظم نے کہاکہ سیلاب کے دوران آپ کی مدد کیلئے بے حد شکرگزار ہوں۔ محمود عباس نے کہاکہ پاکستان ہمارا گھر ہے، پاکستانی ہمارے بھائی اور بہنیں ہیں،پاکستانی ہمارے گھر کے لوگ ہیں، ہم نے اْن کے لئے کچھ بھی نہیں کیا ۔ شہباز شریف نے کہاکہ ایسا نہ کہیں، فلسطین نے سیلاب زدگان کی جس طرح مدد کی، بھول نہیں سکتے،پاکستان کبھی فلسطینیوں کو بھول نہیں سکتا۔ وزیر اعظم نے کہاکہ آپ کی کامیابی تک پاکستان آپ کے حق کے لئے آواز بلند کرتا رہے گا۔ صدر محمود عباس نے کہاکہ ہم پاکستان کو کبھی بھی نہیں بھولتے،ایک سوسال سے ہم پاکستانیوںکوکبھی نہیں بھولے۔ انہوںنے کہاکہ مفتی فلسطین اپنی وفات تک پاکستان میں رہے، ان کی دیکھ بھال پاکستان نے کی، قیام پاکستان سے پہلے سے ہم پاکستانیوں کے ساتھ ہیں۔ وزیر اعظم نے کہاکہ فلسطین ہمارے ایمان ویقین کا حصہ ہے۔ وزیر اعظم نے صدر محمود عباس سے مکالمہ کیا کہ فلسطین ہمارے دل میں ہے۔ شہباز شریف نے کہاکہ نفرنس میں پاکستان کی حمایت کرنے والے راہنمائوں میں آپ شامل ہیں۔ وزیر اعظم نے کہاکہ آپ کی حمایت اور جذبے پر دل کی گہرائیوں سے شکریہ ادا کرتا ہوں۔
