موسم سرما میں بجلی کی طلب و رسد پر کڑی نظر رکھی جائے،وزیراعظم کی ہدایت

0
139

اسلام آباد (این این آئی)و زیراعظم شہباز شریف نے کہا ہے کہ موسم سرما میں بجلی کی طلب و رسد پر کڑی نظر رکھی جائے،موسم سرما میں بجلی کے صارفین کو زیادہ سے زیادہ ریلیف پہنچانے کیلئے تمام ضروری اقدامات اٹھائے جائیں،بجلی پیدا کرنے کیلئے درآمدی ایندھن پر کم سے کم انحصار کیا جائے، مقامی وسائل کو استعمال کر کے عوام کو سستی بجلی مہیا کی جائے۔وزیر اعظم محمد شہباز شریف کی زیر صدارت ایک اہم اجلاس منعقد ہوا، جس میں موسم سرما میں بجلی کی لوڈشیڈنگ پر قابو پانے کے لیے مختلف تجاویز پر غور کیا گیا۔وزارت توانائی نے وزیر اعظم کو موسم سرما میں بجلی کی طلب و رسد اور ایندھن کے تخمینوں پر تفصیلی بریفنگ دی۔وزیر اعظم نے متعلقہ حکام کو ہدایت کی کہ موسم سرما میں بجلی کے صارفین کو زیادہ سے زیادہ ریلیف پہنچانے کے لیے تمام ضروری اقدامات اٹھائے جائیں۔وزیر اعظم نے اس بات کی بھی ہدایت کی کہ بجلی پیدا کرنے کیلئے درآمدی ایندھن پر کم سے کم انحصار کیا جائے، اور مقامی وسائل کو استعمال کر کے عوام کو سستی بجلی مہیا کی جائے۔ملاقات میں سابق وزیر اعظم اور مسلم لیگ (ن) کے رکن قومی اسمبلی شاہد خاقان عباسی، وزیر خزانہ محمد اسحاق ڈار، وزیر برائے پارلیمانی امور مرتضیٰ جاوید عباسی، وزیر توانائی انجینئیرخرم دستگیر، وزیراعظم کے مشیر احد چیمہ، وزیر مملکت برائے پٹرولیم ڈاکٹرمصدق ملک، معاونین خصوصی ڈاکٹر جہانزیب خان، جنید انور چوہدری اور متعلقہ اعلی سرکاری حکام نے شرکت کی۔