اسلام آباد (این این آئی)گورنر اسٹیٹ بنک جمیل احمد نے کہا ہے کہ مہنگے داموں ڈالر فروخت کرنے والے بنکوں کے خلاف رواں ماہ کے آخر تک تحقیقات مکمل کرلی جائیں گی،، مرحلہ وار انکوائری مکمل کرکے ملوث بنکوں کو جرمانے کئے جائیں گے۔سینٹ کی قائمہ کمیٹی برائے خزانہ کو بریفنگ دیتے ہوئے گورنر اسٹیٹ بنک نے بتایا کہ ایکسپورٹرز اب بہتر ریٹ پر جس بینک سے ملے وہاں سے ڈالر لے سکتے ہیں، بینک تین روز میں ایکسپورٹر کو ڈالر دینے کا پابند ہوتا ہے، جس بینک نے ایکسپورٹرز سے ڈالر پر اضافی ریٹ چارج کیا اس پر جرمانے ہوں گے، ملک کے تمام بینکوں کے خلاف اضافی ڈالر ریٹ چارج کرنے کی انکوائری کر رہے ہیں، مرحلہ وار ہر بینک کے خلاف تحقیقات کی جائیں گی۔ جمیل احمد کمیٹی کو بتایا کہ جب سے بنکوں کے خلاف تحقیقات کا آغاز کیا گیا ہے، ڈالر پر اضافی ریٹ وصول کرنے کی شکایت ختم ہوگئی ہے، نومبر کے اختتام تک بینکوں سے متعلق انکوائری مکمل کریں گے۔انہوں نے کہا کہ پرائیویٹ بینکوں نے زرمبادلہ میں کمی کے باعث افواہوں کی بنیاد پر ایل سیز کھولنے کیلئے زیادہ رقم وصول کی۔اس موقع پروزیرمملکت برائے خزانہ عائشہ غوث پاشا نے کمیٹی کوبتایا کہ بینکوں کے خلاف تحقیقات کو عوام کے سامنے لانے کی ہدایات کر دی ہیں جن بینکوں نے ایل سیز کھولنے کیلئے اضافی رقم وصول کی ان کو زیادہ سے زیادہ جرمانہ عائد کیا جائے گا، بینکوں سے اضافی رقم وصول کرنے پر بینکوں سے تحقیقات مکمل کرنے کے بعد جرمانے کیے جائیں گے۔
