وزیر اعلی کی جانب سے طارق ٹیڈی کیلئے اعلان کردہ مالی امداد کاچیک ان کے بیٹے کو دیدیا گیا

لاہور( این این آئی)وزیر اعلی پنجاب چودھری پرویز الٰہی کی جانب سے اداکار طارق ٹیڈی کیلئے اعلان کردہ 5لاکھ روپے کی مالی امداد کا چیک ان کے بیٹے جنید طارق کو دیدیا گیا ۔صوبائی سیکرٹری اطلاعات آصف اقبال لودھی اور وزیر اعلی پنجاب کے پریس سیکرٹری چودھری محمد اقبال نے پی کے ایل آئی میں اداکار طارق ٹیڈی کی عیادت کی ۔سیکرٹری اطلاعات اور پریس سیکرٹری نے وزیر اعلی چودھری پرویزالٰہی کی جانب سے طارق ٹیڈی کے بیٹے کو مالی امداد کا چیک دیا۔ وزیر اعلی پنجاب چودھری پرویزالٰہی نے طارق ٹیڈی کو پھولوں کا گلدستہ بھی بھجوایا اورجلد صحت یابی کیلئے نیک خواہشات کا پیغام بھجوایا ۔وزیر اعلیٰ نے کہا کہ پنجاب حکومت طارق ٹیڈی کے علاج معالجے کیلئے ہر ممکن اقدام کرے گی۔ وزیر اعلیٰ کی ہدایت پر محکمہ سپلائزڈ ہیلتھ کیئر اینڈ میڈیکل ایجوکیشن نے طارق ٹیڈی کے علاج معالجے کیلئے خصوصی میڈیکل بورڈ تشکیل دینے کے لئے مراسلہ بھجوا دیا جس میں ڈین پی کے ایل آئی کو فی الفور میڈیکل بورڈ تشکیل دینے کی ہدایت کی گئی ہے ۔