اسلام آباد (این این آئی)وفاقی وزیرداخلہ رانا ثناء اللہ نے لکی مروت میں پولیس وین پر دہشت گردوں کے حملے کی شدید مذمت اورواقعے پرتشویش کااظہارکرتے ہوئے چیف سیکرٹری اورآئی جی خیبر پختونخواہ سے واقعہ کی رپورٹ طلب کرلی ۔ اپنے بیان میں وزیر داخلہ نے کہاکہ پولیس اہلکاروں کی شہادت کے واقعہ پر گہرے دکھ اور افسوس کااظہار ہے ۔وزیر داخلہ رانا ثناء اللہ نے واقعے میں شہید ہونے والے پولیس اہلکاروں کوخراج عقیدت پیش کیا۔وفاقی وزیر داخلہ نے شہدا کے اہل خانہ سے تعزیت اور ہمدردی کا بھی اظہار کیا اور کہاکہ اللہ تعالیٰ شہداء کے درجات بلند فرمائے اور لواحقین کو صبر جمیل دے۔ آمین
