لاہور ( این این آئی) وزیراعلیٰ پنجاب چودھری پرویز الٰہی نے لاہور میں 513 الیکٹرک بسیں چلانے کی منظوری دیدی۔وزیراعلی چودھری پرویز الٰہی کی زیر صدارت پنجاب ماس ٹرانزٹ اتھارٹی کے اجلاس میں شہر لاہور میں 513 الیکٹرک بسیں چلانے کی اصولی منظوری دیدی۔جبکہ سپیڈوفیڈر بس سروس کی لاہورسے شیخوپورہ اور مریدکے تک توسیع کی بھی منظوری دے دی گئی ہے۔وزیراعلی پرویزالٰہی نے پنجاب ٹرانسپورٹ کمپنی کو بحال اور فعال کرنے جبکہ لاہور فیڈر روٹ کے لئے مزید بسیں لانے کے لیے نیا پراجیکٹ تیار کرنے کا حکم دے دیا ہے۔انہوں نے کہا کہ اورنج لائن میٹروٹرین کے 8سٹیشنز کی کمرشلائزیشن کی جائے گی، بہاولپور سے لودھراں روٹ کو جاری رکھنے کیلئے 12بسیں فراہم کی جائیں گی۔وزیراعلیٰ پنجاب نے راولپنڈی اسلام آباد کی میٹرو بسوں کی تعمیر ومرمت اور نئی بسیں خریدنے کی بھی منظوری دیدی ہے جبکہ سی ڈی اے کو 15بسیں دینے کے فیصلے کی ایکس پوسٹ فیکٹو توثیق کردی ہے۔
