اسلام آباد(این این آئی)وفاقی وزیر اطلاعات مریم اورنگزیب نے کہا ہے کہ 16دسمبر کا دن آرمی پبلک سکول کے شہدا کی عظیم قربانیوں کی ہمیشہ یاد دلاتا رہے گا۔ سانحہ اے پی ایس کے شہدا کی آٹھویں برسی پر پیغام جاری کرتے ہوئے وزیراطلاعات نے کہاکہ8برس گزرنے کے باوجود بھی ہم سانحہ اے پی ایس کو نہیں بھول سکے، بزدل شرپسند عناصر نے قوم کے مستقبل، نہتے کم سن بچوں پر حملہ کر کے انہیں شہید کیا، اس دن کو یاد کر کے کوئی اپنے آنسو نہیں روک سکتا۔انہوںنے کہا سانحہ اے پی ایس کے شہدا نے پوری قوم کو دہشت گردی کے خلاف متحد کیا، ہم نے دہشتگردی کو شکست دینے کیلئے طویل سفر طے کیا، اب پاکستان دیرپا امن اور ترقی کی جانب گامزن ہے۔مریم اورنگزیب نے کہا کہ اللہ تعالی آرمی پبلک سکول کے شہدا کے درجات بلند کرے او ان کے اہلخانہ کو صبر جمیل عطا کرے۔آمین!
