لاہور ( این این آئی) وفاقی وزیر ریلویز و رہنما پاکستان مسلم لیگ (ن) خواجہ سعد رفیق نے کہا ہے کہ سازش، بہتان، منافقت اور پروپیگنڈا کے کپتان تمام تر کوششوں کے باوجود شکست وریخت کی دلدل میں دہنس رہے ہیں۔انہوںنے مائیکرو بلاگنگ ویب سائٹ ٹوئٹر پر جاری اپنے بیان میں کہا کہ نئے پاکستان کے بانی کی باڈی لینگویج اور گفتگوانکی بڑھتی ہوئی فرسٹریشن کو ظاہر کر رہی ہے ۔ سازش بہتان منافقت اور پروپیگنڈا کے کپتان تمام ترکوشش کے باوجود شکست وریخت کی دلدل میں دھنس رہے ہیں ،مرضی کا سچ نہیں چلے گا حضور!۔سعد رفیق نے کہا کہ ہم سے چوروں کونکالنے کے لئے آپ نے اور آپکے سہولت کاروں نے بڑے کھیل کھیلے، سابقہ اسٹییبلشمنٹ پر الزام لگانے سے پہلے سابقہ سلیکٹڈ وزیراعظم2014ء کی دھرنا سازش،میاں نوازشریف کی نااہلی کا ناپاک کھیل اور2018ء کے انتخابات چرانے کی واردات کی تفصیلات قوم سے شیئر کریں ۔ انہوں نے کہا کہ بات تب بنے گی جب عمران کہانی آخر سے نہیں شروع سے شروع کریں گے جسکے وہ سب سے بڑے بینی فیشری ہیں۔
