لاہور ( این این آئی) پنجاب اسمبلی میں قائد حزب اختلاف حمزہ شہباز نے کہاہے کہ رات کے اندھیرے میں اسمبلی قوائد اور آئین پر شب خون مارا گیا ،بدترین دھاندلی کے خلاف آئینی اور قانونی آپشن استعمال کئے جائیں گے۔انہوںنے وزیراعلی پنجاب کے اعتماد کے ووٹ پر اپنے ردعمل کا اظہار کرتے ہوئے کہا کہ پنجاب اسمبلی کی تاریخ کا بدترین واقعہ ہوا ہے،جھرلو اور ہیرا پھیری کر کے اعتماد کے ووٹ کا تقدس پامال کیا گیا ہے۔ پولنگ ایجنٹ مقرر نہ کر کے حکومت نے اپنی بدنیتی اور بد دیانتی ثابت کر دی ہے۔ رات کے اندھیرے میں اسمبلی قوائد اور آئین پر شب خون مارا گیا ہے۔ حمزہ شہباز نے کہا کہ دھوکے سے اسمبلی کارروائی شروع کر کے جعلی گنتی کی گئی، اس بدترین دھاندلی کے خلاف آئینی اور قانونی آپشن استعمال کئے جائیں گے۔
