تل ابیب (این این آئی )اسرائیلی وزیر اعظم بینجمن نیتن یاہو نے سعودی عرب میں ولی عہد محمد بن سلمان اور امریکی وزیر خارجہ مائیک پومپیو کے ساتھ مبینہ طور پر خفیہ ملاقات کی ہے۔ اسرائیلی میڈیا کے مطابق اسرائیلی وزیراعظم سعودی شہر نیوم گئے، جہاں یہ ملاقات ہوئی۔ اسرائیلی خفیہ ایجنسی موساد کے سربراہ ہوسی کوہن بھی اس ملاقات میں شامل تھے۔ اسرائیلی کابینہ کے ایک رکن نے اس ملاقات کی تصدیق کی اور اسے ایک اہم سنگ میل قرار دیا۔ یہ ایسا پہلا موقع ہے جب اسرائیلی اور سعودی قیادت نے براہ راست بات چیت کی۔ اسرائیل اس سے قبل خطے میں متحدہ عرب امارات اور بحرین سے سفارتی تعلقات قائم کر چکا ہے۔ ان دو عرب ملکوں کی طرح اب سعودی عرب کی جانب سے بھی اسرائیل کے ساتھ سفارتی تعلقات استوار کرنے پر غور کرنے کی افواہیں گردش کر رہی ہیں۔
