جدہ (این این آئی)اسلامی تعاون تنظیم کے سیکرٹری جنرل حسین ابراہیم طہ نے کہا ہے کہ پاکستان امت مسلمہ کا ایک اہم ستون ہے،امت مسلمہ کی ترقی کا واحد راستہ اعلیٰ تعلیم ہے۔ان خیالات کا اظہار انھوں نے او آئی سی کے ہیڈ کوارٹر جدہ میں پاکستان کے معروف اسکالر پروفیسر سجاد قمر سے ملاقات میں کیا۔حسین ابراہیم طہ نے کہا کہ علم اور دریافت مسلمانوں کا ورثہ ہے،ابن خلدون،الرازی،ابن الہیثم اور دیگر بہت بڑے بڑے سائنسدان مسلمان تھے،اگر ہم اپنی غم شدہ میراث واپس لینا چاہتے ہیں تو ہمیں تعلیمی میدان میں آگے بڑھنا ہو گا،تحقیق اور ایجادات پر محنت کرنا ہو گی۔پروفیسر سجاد قمر نے حسن استقبال پر سیکرٹری جنرل کا شکریہ ادا کیااور کہا کہ حسین ابراہیم طہ نے پاکستان کے دورے کے دوران کنٹرول لائن کا دورہ کر کے کشمیر اور پاکستان کے عوام کے دل جیت لیے،مسئلہ کشمیر تقسیم برصغیر کا نامکمل ایجنڈا ہے اور رائے شماری ہی اس کا واحد حل ہے۔پروفیسر سجاد قمر نے کہا یو ایم ٹی او آئی سی کیساتھ مل کر مسلم دنیا کے بہترین مسلمان سائنسدانوں کی ایک کانفرنس پاکستان میں منعقد کریگی اور اس کے خاطر خواہ نتائج برآمد ہوں گے۔انھوں نے کہا کہ تعلیم ہماری ترجیحات میں سب سے نیچے ہے۔اگر ہم جدید دنیا کا مقابلہ کرنا چاہتے ہیں تو ہمیں تعلیمی بجٹ بڑھانا ہو گا۔
