اسلام آباد (این این آئی )وزیر داخلہ رانا ثناء اللہ خاں نے چوہدری وجاہت اور چوہدری حسین الٰہی کی آڈیو لیک پر رد عمل کا اظہار کرتے ہوئے کہا ہے کہ جرائم پیشہ عناصر کا مجرمانہ منصوبہ بے نقاب ہوگیا ،عمران خان مسلم لیگ (ن) اور اس کے اتحادی (ق) لیگ کے ارکان کا ضمیر خریدنے کیلئیبولیاں لگا رہے ہیں ، سپریم کورٹ کو آڈیو اور ضمیر کی خریداری کے اعترافی بیانات کا نوٹس لینا چاہیے ۔اپنے بیان میں وزیر داخلہ نے کہاکہ ایک معزز خاتون رکن قومی اسمبلی کے اغوا کا مجرمانہ ارادہ اور توہین آمیز گفتگو انتہائی قابل مذمت ہے ۔ انہوںنے کہاکہ عمران خان مسلم لیگ (ن) اور اس کے اتحادی (ق) لیگ کے ارکان کا ضمیر خریدنے کے لئے بولیاں لگا رہے ہیں ۔ انہوںنے کہاکہ سپریم کورٹ کے چیف جسٹس کو اس آڈیو اور ضمیر کی خریداری کے اعترافی بیانات کا نوٹس لینا چاہیے ۔ انہوںنے کہاکہ پارٹی سربراہ چوہدری شجاعت حسین اور ایم این اے فرح خان کو کون سی عدالت انصاف دے گی؟ ،سپیکر قومی اسمبلی کو بھی اس آڈیو کا نوٹس لے کر کارروائی کرنی چاہیے،قوم نے دیکھ لیا کہ کون ضمیر خریدتا اور بولیاں لگاتا ہے، اغوا کار کون ہے؟ ۔ انہوںنے کہاکہ ڈسکہ میں الیکشن عملے اور ووٹوں کے تھیلے “اغوا” کرنے والے اب ارکان قومی اسمبلی کے اغوا کے منصوبے بناتے پکڑے گئے ہیں ،آئی ایم ایف پروگرام ناکام بنانے کی سازش بناتے ہیں تو کبھی سائیفر پر جعلسازی کرتے پکڑے جاتے ہیں۔ وزیر داخلہ نے کہاکہ طیبہ گل کے اغوا کار ، چئیرمن نیب کے بلیک میلر اور بشیرمیمن کو دھمکیاں دینے والے مجرم نئی واردات کی تیاری کرتے پکڑے گئے ہیں۔ رانا ثناء اللہ نے کہاکہ ہیروئن کا جھوٹا مقدمہ بنانے والے اب اغوا کی وارداتیں بنا رہے ہیں
