اسلام آباد ( این این آئی) پاکستان کے سر کاری دورے پر موجود اقوام متحدہ کے ماحولیاتی پروگرام کی ایگزیکٹو ڈائریکٹر محترمہ انگر اینڈرسن نے منگل کو وزیراعظم محمد شہباز شریف سے ملاقات کی۔ وزیر اعظم نے یو این ای پی کی طرف سے کئے جا رہے کام کی تعریف کی اور موسمیاتی تبدیلی، حیاتیاتی تنوع کے نقصان، اور ماحولیاتی نظام کے انحطاط کو زیادہ مؤثر طریقے سے حل کرنے کےلئے کوششوں کو بڑھانے پر زور دیا۔ انہوں نے کہا کہ موسمیاتی تبدیلی آج کے بڑے مسائل میں سے ایک ہے۔ انہوں نے کہا کہ پاکستان موسمیاتی تبدیلیوں سے سب سے زیادہ متاثر ممالک میں سے ایک ملک ہے اور پاکستان نے موسمیاتی تبدیلیوں سے نمٹنے کے حوالے سے بھرپور اقدامات کی۔ ایگزیکٹو ڈائریکٹر نے وزیراعظم کو یو این ای پی کی جانب سے پاکستان میں اٹھائے جانے والے اقدامات پر بریفنگ دی اور یو این ای پی میں پاکستان کے فعال کردار کو سراہا۔ وزیر اعظم نے یو این ای پی کے حوالے سے گفتگو کرتے ہوئے کہا کہ وہ تباہ کن سیلابوں کے بعد پاکستان کی بحالی کی کوششوں میں اس کا ساتھ دے.
