لاہور ( این این آئی) وزیراعظم محمد شہبازشریف سے مسلم لیگ (ن) لاہور کے صدر سیف الملوک کھوکھر نے ماڈل ٹائون میں ملاقات کی ۔ اس موقع پر پارٹی کی تنظیم سازی سمیت دیگر امور پر تبادلہ خیال کیا گیا ۔ سیف الملوک کھوکھر نے وزیر اعظم شہباز شریف کو لاہور میں پارٹی کی تنظیم سازی کے حوالے سے بریف کیا ۔ وزیراعظم نے سیف الملوک کھوکھر کومسلم لیگ (ن) لاہور کا صدر بننے پرمبارکباد دیتے ہوئے اپنے اعتماد کا اظہار کیا ۔ وزیراعظم نے سیف الملوک کھوکھر کو لاہور میں کارکنان کو متحرک کرنے کی ہدایت کرتے ہوئے چیف آرگنائز مسلم لیگ (ن) مریم نوازکے کامیاب استقبال پر شاباش بھی دی ۔ شہباز شریف نے کہا کہ پارٹی کی مظبوطی کے لئے ایسے ہی کام کرتے رہیں ،امید ہے کہ لاہور کو اچھی طرح سے چلائیں گے ۔سیف الملوک کھوکھر نے کہا کہ میاں نوازشریف اور شہباز شریف کے ویثرن کے مطابق پارٹی کی بہتری کے لیے کام کرتا رہوں گا۔
