ریاض (این این آئی)سعودی فرمانروا شاہ سلمان بن عبدالعزیز اور ولی عہد شہزادہ محمد بن سلمان نے شاہ سلمان انسانی امداد اورریلیف مرکز(کے ایس آر ای ایف) کوشام اور ترکیہ میں زلزلے سے متاثرہ علاقوں میں فوری امداد مہیا کرنے کیلئے فضائی پل بنانے کی ہدایت کردی ۔سعودی سرکاری میڈیا کی جانب سے جاری بیان میں کہا گیا ہے کہ اس فضائی پل کے ذریعے زلزلے سے متاثرہ شامی اور ترک عوام کو طبی سامان، ادویہ ،رہائش کے لیے خیمے، خوراک کا سامان مہیا کیا جائیگا۔اس کے علاوہ یہ لاجسٹک معاونت بھی مہیا کرے گا۔خادم الحرمین الشریفین اورولی عہد کی ہدایات میں دونوں ممالک میں زلزلے سے متاثرہ افراد کی امداد کیلئے “سہیم” پلیٹ فارم کے ذریعے ایک مہم کا انعقاد بھی شامل ہے۔ایس پی اے کے مطابق شاہی دیوان کے مشیراور کے ایس ریلیف کے نگران اعلی ڈاکٹرعبداللہ بن عبدالعزیز الربیعہ نے اس بات کی تصدیق کی ہے کہ یہ امداد خادم الحرمین الشریفین اور ولی عہد کی جانب سے شام اور ترکی میں زلزلے سے متاثرہ افراد کے ساتھ مصیبت کی اس گھڑی میں شانہ بشانہ کھڑے ہونے کی خواہش کی مظہرہے۔
