دوحہ(این این آئی )امیر قطر شیخ تمیم بن حمد الثانی نے ترکی کا دورہ کیا ہے جہاں انہوں نے صدر ترکیہ رجب طیب اردوان سے ملاقات کی ہے۔قطری سرکاری ایجنسی کی رپورٹ کے مطابق امیر قطر شیخ تمیم بن حمد الثانی نے استنبول میں رجب طیب اردوان سے ملاقات میں دونوں ممالک کے درمیان موجودہ اسٹریٹجک تعلقات، مختلف شعبوں میں تعاون بڑھانے اور خطے کی تازہ ترین صورتحال پر تبادلہ خیال کیا۔ملاقات میں علاقائی اور بین الاقوامی سطح پر تمام مسائل اور پیش رفت پر بھی گفتگو کی گئی۔رپورٹ کے مطابق امیر قطر نے حالیہ زلزلے کے متاثرین کیلیے ترکی کے صدر سے قطر کی قیادت، حکومت اور عوام کی جانب سے برادر ترک عوام کے ساتھ تعزیت اور یکجہتی کا اظہار کیا، کہا کہ صورتحال پر قابو پانے کیلیے ہر قسم کی مدد فراہم کرنے کا سلسلہ جاری رکھیں گے۔اس موقع پر ترک صدر نے امیر قطر اور ان کے ہمراہ آنے والے وفد کے اعزاز میں عشائیے کا اہتمام بھی کیا۔
