اسلام آباد (این این آئی)پاکستان ڈیموکریٹک موومنٹ (پی ڈی ایم) کے ترجمان حافظ حمد اللہ نے کہاہے کہ آئین شکن عمران خان اور عارف علوی کے خلاف آرٹیکل 6 کی کارروائی ہونی چاہیے، پارلیمنٹ آئین شکنی کرنے والوں کا ہاتھ روکے،انتخابات الیکشن کمیشن نے کرانے ہیں، عمران خان اور عارف علوی نے نہیں۔ اپنے بیان میں حافظ حمد اللہ نے کہاکہ عارف علوی نے انتخابات کی تاریخ کا حکم نامہ نہیں ”سلیکشن نامہ”جاری کیا، مسترد کرتے ہیں۔ انہوںنے کہاکہ یہ ملک میں ”ون پارٹی رول”اور پاکستان کو پھر ”ون یونٹ”بنانے کی سازش ہے ۔ انہوںنے کہاکہ ہم علوی کی طرح غلام نہیں کہ عمران خان جو کہے، ہم وہ کرنے پر مجبور ہوں ۔ انہوںنے کہاکہ عمران خان کے ساتھ ”حسن سلوک” سے پتہ چلتا ہے کہ نیپیاں اب بھی تبدیل کی جارہی ہیں ۔ انہوںنے کہاکہ عمران خان کی عدالتوں میں شاہانہ پیشیاں نظام عدل کا منہ چڑا رہی ہیں ۔ انہوںنے کہاکہ ایک شخص کے سامنے آئین، قانون اور عدلیہ سب بے بس تھے اور ہیں۔ انہوںنے کہاکہ سیاستدانوں پر طبرے بھیجنے والے عمران خان کی منتیں ترلے کر رہے ہیں، سبحان اللہ کیا مساوی انصاف ہے؟ ۔ انہوںنے کہاکہ ذوالفقار علی بھٹو، نوازشریف، یوسف رضا گیلانی اور عمران خان کے ساتھ عدالتی رویے ملک میں رائج ‘دو پاکستان، دو نظام’ کا ثبوت ہے ۔انہوںنے کہاکہ اپوزیشن پر رحم نہ کھانے والوں کے سینے میں عمران خان کے لئے رحم دلی کا دریا موجیں مار رہا ہے ،جیلوں میں بند لوگوں کو اچھا پیغام دیا گیا کہ پاکستان میں انصاف کیسے ملتا ہے
