کراچی(این این آئی)پاکستان پیپلز پارٹی کے رہنما اور مشیر زراعت سندھ منظوروسان نے چیئرمین پی ٹی آئی عمران خان کے مارچ میں نااہل ہونے اور جیل جانے کی پیشگوئی کی ہے۔اپنے ایک بیان میں منظور وسان نے کہا کہ عمران خان مارچ میں نااہل ہوجائیں گے اور پرانے مقدمات بھی کھل جائیں گے، وہ جب نااہل ہوں گے اور جیل جائیں گے تب ان کے پرانے ساتھی علیحدگی اختیار کریں گے۔انہوں نے کہاکہ عمران خان جیل جانے سے ڈر رہے ہیں اسی لئے دیگر رہنما بھی جیل نہیں جانا چاہتے، جیل بھرو تحریک چلانا کوئی آسان کام نہیں ہے۔انہوں نے کہا کہ جیل بھروتحریک کے لئے سب سے پہلے خود گرفتاری دینا پڑتی ہے۔صوبائی وزیر نے کہا کہ ملک میں مہنگائی سے چھوٹے سرکاری ملازمین اور مزدور طبقہ کافی پریشان ہے، عمران خان دور میں ملک میں مہنگائی میں اضافہ ہوا۔انہوں نے کہاکہ چھوٹے گریڈ کے سرکاری ملازمین کی تنخواہیں 70 فیصد بڑھائی جائیں، مزدوروں کی بھی مزدوری میں اضافہ کا اعلان کیا جائے۔
