لندن (این این آئی)سعودی عرب کے وزیر خارجہ فیصل بن فرحان نے کہاہے کہ شام کے ساتھ رابطوں میں اضافے سے اس کی عرب لیگ میں واپسی کی راہ ہموار ہو گی لیکن ابھی اس متعلق بات کرنا قبل از وقت ہوگا۔غیرملکی خبررساں ادارے کے مطابق گزشتہ روز لندن میں میڈیا نمائندگان سے بات کرتے ہوئے انہوں نے کہا کہ عرب دنیا میں اس بات پر اتفاق رائے پیدا ہو رہا ہے کہ شام کو علیحدہ کرنا درست نہیں اور دمشق سے مذاکرات کی ضرورت ہے بالخصوص وہاں انسانی المیے کی صورتحال سے نمٹنے کیلئے ایسا ضروری ہے۔یاد رہے کہ 2011 میں صدر بشارالاسد کی طرف سے حکومت مخالف احتجاجی مظاہرین کے خلاف شدید کریک ڈان کی وجہ سے شام کی عرب لیگ کی رکنیت معطل کر دی گئی تھی۔صرف یہی نہیں بلکہ کئی عرب ممالک نے دمشق سے اپنے سفیروں کو واپس بلا لیا تھا۔لیکن 6 فروری کو آنے والے ہلاکت خیز زلزلے کے بعد بشارالاسد کو عرب ریاستوں کی طرف سے بہت مدد مل رہی ہے۔
