اسلام آباد (این این آئی)وفاقی تحقیقاتی ادارے (ایف آئی اے) کے سابق سربراہ بشیر میمن نے انکشاف کیا ہے کہ ارشد ملک ویڈیو کیس میں سابق وزیراعظم عمران خان اور اْن کے پرنسپل سیکریٹری اعظم خان نے ان پر دبائو ڈالا۔ایک انٹرویو میں بشیر میمن نے کہا کہ بار بار اْن پر دبائوڈالا گیا کہ ناصر جنجوعہ پر تشدد کرکے انھیں نواز شریف اور مریم نواز کے خلاف بیان دینے پر مجبور کریں۔ انہوں نے کہا کہ عمران خان کا اصرار تھا کہ بیان دلوانے کیلئے ہر قانونی اور غیرقانونی طریقہ استعمال کیا جائے، ایف آئی اے نے تحقیقات کی تو پتا چلا کہ ناصر جنجوعہ کا ویڈیو اسکینڈل سے کوئی تعلق نہیں۔بشیر میمن نے کہا کہ ناصر جنجوعہ کے بے گناہ ہونے کا سن کر عمران خان بہت ناراض ہوئے، ناصر جنجوعہ نواز شریف فیملی کے قابل اعتماد دوست تصور کئے جاتے ہیں۔
