اسلام آباد (این این آئی)وزیر مملکت برائے خارجہ امور حنا ربانی کھر 5 سے 13 جون تک ناروے، سویڈن، ڈنمارک اور بیلجئم کا سرکاری دورے کریں گی۔ جمعرات کو دفتر خارجہ کی ترجمان ممتاز زہرا بلوچ نے بتایا کہ وزیر مملکت برائے خارجہ امور حنا ربانی کھر ترقی، تجارت اور موسمیاتی تبدیلی کے چیلنجز اور مسئلہ کے بارے میں تعاون پر تبادلہ خیال کے لیے وزارتی سطح پر اجلاسوں میں شرکت کریں گی۔ وہ قانون سازوں اور مقامی تاجروں سے بھی ملاقات کریں گی۔ انہوںنے کہاکہ حنا ربانی کھر بیلجئم میں یورپی پارلیمنٹ کے اراکین اور یورپی کمیشن کے سینئر حکام سے ملاقاتیں کریں گی۔ سویڈن میں، انہوںنے کہاکہ وزیر مملکت یورپی کونسل برائے خارجہ تعلقات کے سالانہ اجلاس میں کلیدی مقرر کے طور پر شرکت کریں گے۔ وہ علاقائی اور عالمی اہمیت کے مسائل پر پاکستان کا نقطہ نظر پیش کریں گی اور خارجہ پالیسی کی ترجیحات اور چیلنجز پر بحث کے لیے یورپ کے سرکردہ فیصلہ سازوں، ماہرین، تھنک ٹینکس اور اثرورسوخ رکھنے والی شخصیات کے ساتھ بات چیت کریں گی۔
