لاہور( این این آئی)آسکر ایوارڈ یافتہ پاکستانی فلم میکر شرمین عبید چنائے کی موسمیاتی تبدیلی کے حوالے سے نئی دستاویزی سیریز جاری کر دی گئی ۔شرمین عبید چنائے نے اپنی دستاویزی فلم کا ٹائٹل چیمپیئنز آف کلائمیٹ چینج،وائسز فار اے گرینر پاکستان رکھا ہے ۔شرمین عبید کی نئی ڈاکیومنٹری چار حصوں پر مشتمل ہے، اس فلم کا مقصد ان پاکستانیوں کی آواز کو اجاگر کرنا ہے جوکہ موسیماتی تبدیلوں کے باعث بڑے بحرانوں اورمشکلات کا سامنا کر رہے ہیں۔ دستاویزی فلم کے یہ ہیروز نہ صرف ان بحرانوں سے نمٹ رہے ہیں بلکہ ان کی کاوشیں دوسروں کو بھی متاثر کر رہی ہیں کہ وہ عالمی موسمیاتی تحریک کا حصہ بنیں۔دستاویزی فلم کی ہر ایک فلم موسمیاتی تبدیلی اور ماحولیاتی تحفظ کے ایک الگ پہلو کو پیش کرئے گی۔فلم کی کہانی 4 ایسے افراد کی ہے جو کہ پاکستان میں نمایاں تبدیلی لا رہے ہیں۔ ڈاکیومنٹری فلم میں کراچی ،جیکب آباد، پنجگور،ژوب سے تعلق رکھنے والے ماحول دوست ہیروز کی کاوشوں کو عکس بند کیا گیا ہے۔ڈاکیومنڑی سیریز کو چار حصوں میں تقسیم کیا گیا ہے جس میں ہمارا رشتہ سمندر سے،ہنگامی حالات،ایک ساتھ مل کر با اختیار اور چھوٹے قدم بڑے اثرات ہیں۔
