اسلام آباد (این این آئی)اسپیکر قومی اسمبلی راجہ پرویز اشرف نے کہا ہے کہ اظہار رائے کی آزادی بنیادی آئینی حق ہے، پارلیمان صحافیوں کو درپیش مسائل کو حل کرنے کیلئے پرعزم ہے۔ ان خیالات کا اظہار انہوں نے پاکستان فیڈرل یونین آف جرنلسٹس (PFUJ) کے صدر افضل بٹ کی قیادت میں ایک وفد سے ملاقات کے دوران کیا۔اسپیکر قومی اسمبلی نے کہا کہ جمہوریت کے استحکام کے لیے صحافی برادری کی گراں قدر خدمات کو سراہتے ہیں اور اس امید کا اظہار کیا کہ PFUJ میڈیا اور صحافی برادری کو درپیش مسائل کے حل کے لیے اپنا بھرپور کردار ادا کرتی رہے گی۔میڈیا کی آزادی اور اظہار رائے کی آزادی کو بنیادی آئینی حقوق کے طور پر اجاگر کرتے ہوئے اسپیکر راجہ پرویز اشرف نے وفد کو یقین دلایا کہ پارلیمنٹ ان اصولوں کو برقرار رکھنے پر پختہ یقین رکھتی ہے۔ انہوں نے میڈیا کے عملے اور صحافیوں کے لیے خاص طور پر پارلیمنٹ میں ایک قابل پیشہ ورانہ ماحول پیدا کرنے اور ان کے تحفظات کو دور کرنے میں مکمل تعاون فراہم کرنے کے اپنے عزم پر زور دیا۔پی ایف یو جے کے صدر افضل بٹ نے صحافیوں کو درپیش چیلنجز پر قابو پانے کے لیے اجتماعی کوششوں کی ضرورت پر زور دیا اور پائیدار حل تلاش کرنے کے لیے پی ایف یو جے کے قومی اسمبلی کے ساتھ مل کر کام کرنے کے عزم کا اعادہ کیا۔
