اسلام آباد (این این آئی) سوڈان میں تعینات پاکستانی سفیر سرفراز احمد سپرا نے وزارتِ خارجہ میں وزیر خارجہ مخدوم شاہ محمود قریشی سے ملاقات کی جس میں سفیر سرفراز احمد سپرا نے او آئی سی وزرائے خارجہ کونسل کے اجلاس میں شرکت اور کشمیر کا مقدمہ موثر انداز میں پیش کرنے پر وزیر خارجہ کو مبارکباد پیش کی ۔ شاہ محمود قریشی نے کہاکہ او آئی سی وزرائے خارجہ کونسل کے سنتالیسویں اجلاس کے موقع پر ہم نے انگیج افریقہ پالیسی کے پیش نظر میں نے سوڈان سمیت بہت سے افریقی ممالک کے وزرائے خارجہ کے ساتھ تبادلہ خیال کیا ۔وزیر خارجہ نے پاکستان اور سوڈان کے مابین دو طرفہ تجارت، سرمایہ کاری اور مختلف شعبہ جات میں دو طرفہ تعاون کے میسر مواقعوں کو پیش نظر رکھتے ہوئے دو طرفہ تعلقات کے فروغ کیلئے اپنی کاوشیں تیز کرنے کی ہدایت کی ۔وزیر خارجہ نے سوڈان میں تعینات پاکستانی سفیر کے والد کے انتقال پر تعزیت کی اور مرحوم کی مغفرت اور بلندی درجات کیلئے دعا کی۔سوڈان میں پاکستانی سفیر سرفراز احمد سپرا نے پاکستان کی سفارتی ترجیحات بالخصوص انگیج افریقہ پالیسی کے حوالے سے خصوصی ہدایات پر وزیر خارجہ کا شکریہ ادا کیا
