اسلام آباد (این این آئی)پاکستان سپورٹس بورڈ کے زیر اہتمام ملک بھر میں جشن آزادی کھیلوں کے مقابلے 14 اگست کو منعقد ہونگے۔ گزشتہ روز پاکستان سپورٹس بورڈ کے ڈپٹی ڈی جی شاہد اسلام نے بتایا کہ یہ مقابلے پاکستان سپورٹس بورڈ کے ڈائریکٹر جنرل شعیب کھوسہ کی خصوصی ہدایات پر منعقد کئے جا رہے ہیں اور پی ایس بی جشن آزادی کھیلوں کے مقابلوں کی تیاریاں زور و شور سے جاری ہیں یہ مقابلے گزشتہ سالوں کی طرح اسلام آباد، لاہور، پشاور، کراچی اور بلوچستان پی ایس بی کوچنگ سینٹرز میں منعقد ہونگے۔ اس سلسلہ میں رانا نصراللہ کو کوآرڈینیٹر مقررہ کیا گیا ہے۔ انہوں نے سپورٹس آرگنائزرز اور کھلاڑیوں سے بھی اپیل کی ہے کہ وہ 14 اگست کو اپنے، اپنے علاقوں میں بھی کھیلوں کے مقابلے منعقد کروائیں تاکہ یہ دن شان و شوکت منایا جا سکے۔
