اسلام آباد (این این آئی)وفاقی وزیر برائے تجارت صنعت و پیداوار ڈاکٹر گوہر اعجاز سے پاکستان میں سعودی عرب کے سفیر نواف بن سعید المالکی نے ملاقات کی جس میں سعودی سفیر نے ڈاکٹر گوہر اعجاز کو ان کی حالیہ تقرری پر مبارکباد پیش کی۔ڈاکٹر گوہر اعجاز نے پاکستان اور سعودی عرب کے درمیان مضبوط تاریخی تعلقات پر تبادلہ خیال کرتے ہوئے پاکستان کے معاشی استحکام اور ترقی میں سعودی عرب کی مسلسل حمایت پر شکریہ ادا کیا۔ گوہر اعجاز نے سعودی قیادت کی بصیرت کو سراہتے ہوئے سفیر نواف کو پاکستان کی غیر متزلزل شراکت داری اور اعتماد کا یقین دلایا۔ سعودی سفیر نے سعودی عرب اور پاکستان کے درمیان برادرانہ رشتے پر زور دیا جس میں باہمی اعتماد کے مختلف دوطرفہ اور علاقائی معاملات پر تعاون ہے۔ سعودی سفیر نے ملک کے تجارتی امکانات کو بڑھانے کے لیے وزیر کی کوششوں کی بھی تعریف کی۔اجلاس میں ڈاکٹر گوہر اعجاز نے سعودی سفیر کا وزارت تجارت میں خیرمقدم کرتے ہوئے جذبہ خیرسگالی کے طور پر انہیں سووینئر پیش کیا۔
